ଆଜି ସରୁଛି ଗୁପ୍ତଚର ବୃତ୍ତିରେ ଗିରଫ ଜ୍ୟୋତି ମାଲହୋତ୍ରାଙ୍କ ଦ୍ବିତୀୟ ପର୍ଯ୍ୟାୟ ରିମାଣ୍ଡ ଅବଧି । ତେବେ ଏହା ମଧ୍ୟରେ ସାମନାକୁ ଆସୁଛି ଜ୍ୟୋତିଙ୍କୁ ନେଇ ବଡ଼ ଖୁଲାସା । ପାକିସ୍ତାନ ଗସ୍ତବେଳେ ଜ୍ୟୋତିଙ୍କୁ ମିଳୁଥିଲା ହାଇ ସିକ୍ୟୁରିଟି । ଏକେ ୪୭ ଧରିଥିବା ୬ଜଣ ବନ୍ଧୁକଧାରୀ ତାଙ୍କୁ ସିକ୍ୟୁରିଟି ଦେଉଥିଲେ।
ଏଭଳି ଚାଞ୍ଚଲ୍ୟକର ଖୁଲାସା କରିଛନ୍ତି ସ୍କଟଲାଣ୍ଡର ଜଣେ ୟୁଟ୍ୟୁବର। ସ୍କଟଲାଣ୍ଡର ୟୁଟ୍ୟୁବର କାଲମ ମିଲ ମାର୍ଚ୍ଚ ମାସରେ ପାକିସ୍ତାନ ଗସ୍ତ କରିଥିଲେ। ଲାହୋରର ଅନାରକଲି ବଜାରରେ ବୁଲି ଭିଡିଓ ସୁଟ କରିଥିଲେ। ସେଠାରେ ବହୁ ବନ୍ଧୁକଧାରୀ ଜାକେଟ ପିନ୍ଧିଥିବା ବେଳେ ସେଥିରେ ନୋ ଫିୟର ଲେଖାଥିଲା ।
ଭିଡିଓରେ ଜ୍ୟୋତି ମାଲହୋତ୍ରାଙ୍କୁ ଦେଖିବା ପରେ କାଲମ ମିଲ ତାଙ୍କ ନିକଟକୁ ଯାଇ ନିଜର ପରିଚୟ ଦେଇଥିଲେ। ଜ୍ୟୋତି ତାଙ୍କୁ ପ୍ରଥମ ପାକିସ୍ତାନ ଗସ୍ତ ବୋଲି ପଚାରିଥିଲେ। ଉତ୍ତରରେ ଏହା ତାଙ୍କର ପଞ୍ଚମ ପାକିସ୍ତାନ ଗସ୍ତ ବୋଲି କହିଥିଲେ କାଲମ ମିଲ।
ପାକିସ୍ତାନର ଆତିଥେୟତା ନେଇ ସ୍କଟଲାଣ୍ଡ ୟୁଟ୍ୟୁବରଙ୍କ ପ୍ରଶ୍ନରେ ଚମତ୍କାର ବୋଲି କହିଥିଲେ ଜ୍ୟୋତି। ତେବେ ଏହି ସମୟରେ ଜ୍ୟୋତିଙ୍କ ଚାରିପାଖରେ ୬ଜଣ ବନ୍ଧୁକ ଧାରୀ ତାଙ୍କୁ ସୁରକ୍ଷା ପ୍ରଦାନ କରୁଥିବା ଦେଖିଥିଲେ କାଲମ । ଏହା ତାଙ୍କୁ ଚକିତ କରିଥିଲା ବୋଲି କହିଛନ୍ତି ସ୍କଟଲାଣ୍ଡ ୟୁଟ୍ୟୁବର।
ଜଣେ ୟୁଟ୍ୟୁବରଙ୍କୁ ବନ୍ଧୁକଧାରୀଙ୍କ ସୁରକ୍ଷା କଣ ପାଇଁ ବୋଲି ପ୍ରଶ୍ନ କରିଛନ୍ତି।
